ACIDENTE LABORAL = TERRORISMO PATRONAL. MAIS UM TRABALHADOR MORTO


Na tarde de 20 de Junho morria no seu posto de trabalho Manuel Vilas Sam Joam, de 48 anos, empregado na empresa GRANITOS MONDARIZ, ubicada na paróquia de Prado.

De Ponte Areas de Esquerda queremos antes de mais nada exprimir as nossas condolências a todos os seres queridos de Manuel Vilas nestes difíceis momentos.

Porém nom podemos deixar de reflectir sobre as causas desta nova vítima no trabalho. Os empresários mancham umha e outra vez as suas maos com o sangue da classe trabalhadora únicamente para atingir o principal objetivo: acumular o maior benefício possível com o mínimo custo. Isto é o que provoca a situaçom actual que padece a imensa maioria da classe trabalhadora em Ponte Areas: incumprimento dos convénios, jornadas laborais extenuantes, ausência ou baixas medidas de segurança, contratos precários, carência de direitos sindicais...

De Ponte Areas de Esquerda mantemos a firme determinaçom de continuar com o caminho encetado com a nossa candidatura às eleiçons municipais de Maio, o da imprescindível auto-organizaçom da classe trabalhadora de Ponte Areas para ser nós quem imponhamos as nossas condiçons à patronal, e nom à inversa como sucede na actualidade.

As forças políticas com representaçom municipal som cúmplices da nossa situaçom, nom há interesse real em plantar cara aos empresários.

A morte de Manuel Vilas é mais umha razom, mais um motivo para continuar a luitar, a denunciar e a fazer fronte à exploraçom capitalista.

Ponte Areas de Esquerda valoriza resultados eleitorais

BNG: 3584; PP: 3319; UCPA: 2898; PSOE: 2353; IU: 197; PDEE: 159

Os resultados eleitorais de Ponte Areas de Esquerda som positivos por quanto constatam um incremento espectacular do voto da esquerda independentista na localidade.
Os 159 votos, (1.26%), de Ponte Areas de Esquerda suponhem a multiplicaçom por sete dos resultados atingidos por NÓS-UP nas europeias de Junho de 2004 e nas autonómicas de Junho de 2005.
Embora ainda estamos muito longe do mínimo respaldo eleitoral necessário para lograrmos representaçom institucional o apoio recebido 27 de Maio é umha modesta, mas esperançadora e clara mensagem de apoio ao trabalho realizado pola esquerda soberanista nestes dous últimos anos.

Ponte Areas de Esquerda quer agradecer publicamente a coragem e firmeza das 159 pessoas que apostárom pola nossa opçom conscientes das imensas dificuldades de atingir o número necessário de votos para poder ter representaçom municipal.
A todas elas manifestamos que o projecto sócio-político que estamos construindo vai continuar, e que vamos seguir defendendo desde fora do Concelho, tal como até agora vimos fazendo, o melhor para os interesses da classe trabalhadora de Ponte Areas.

Finalmente apelamos aos sectores soberanistas e de esquerda da localidade a converger connosco no desenvolvimento desta alternativa plural e integradora que Ponte Areas de Esquerda representa.


Ponte Areas, 29 de Maio de 2007

Video Eleitoral de Ponte Areas de Esquerda

Crónica início de campanha


No início do dia 11 de Maio, membros de Ponte Areas de Esquerda e simpatizantes começavam a campanha eleitoral na Praça Maior com a habitual colagem de cartazes e acompanhados de meios de comunicaçom locais e pola carrinha habilitada para desenvolver todas as actividades de propaganda previstas. Abraám Alonso destacou a intensa pré-campanha levada a cabo que "só podemos avaliar muito positivamente. Hoje entramos nos últimos dias de esforço e sacrifício. Mas para desenvolver com sucesso esta recta final, antes devemos ter claro e dizer bem alto o que somos. Somos classe trabalhadora organizada na defesa dos interesses da maioria social. Na defesa dos interesses de quem mais dá à sociedade e menos obtém dela. Somos a semente da mudança que a maioria leva anos aguardando e nunca chega. As forças que actualmente contam com representaçom municipal nom podem mudar a realidade porque acatam umhas regras de jogo impostas das quais se beneficiam. Regras de jogo que beneficiam umha minoria em detrimento da imensa maioria prejudicada.

Temos umhas características das quais carecem as restantes forças que se apresentam:
- Sabemos que somos a única candidatura formadaintegralmente por trabalhadoras e trabalhadores
- Sabemos que somos a única com igual número de mulheres que de homens
- Sabemos que somos a única candidatura com importante representaçom da comunidade imigrante
- Sabemos que somos a única candidatura que dará voz e voto às vizinhas e vizinhos de Ponte Areas
- Sabemos, em definitiva, que somos incorruptíveis vizinhas e vizinhos com a firme determinaçom de que a classe trabalhadora conte de umha vez por todas com representaçom própria.

Nem PSOE nem BNG tenhem estas características fundamentais, nem muito menos PP nem UCPA. Devemos fazer gala do que somos e pelejar cada voto.

Companheiras e companheiros, muito ánimo e vamos polos 600!!!
Viva a classe trabalhadora!!
Viva Ponte Areas de Esquerda!!"